പ്രിയ പിണറായി സഖാവെ...

നിങ്ങളുടെ ഇന്നത്തെ ഒരു പ്രസ്താവനയാണ് എനിക്കിതെഴുതാന്‍ പ്രേരകം ആയതു.ആ പ്രസ്താവന താഴെ കൊടുക്കട്ടെ.

നാദാപുരത്തെ ബോംബ് നിര്‍മാണം ലീഗ് നേതൃത്വത്തിന്റെ അറിവോടെ: പിണറായി

കോഴിക്കോട്: നാദാപുരത്ത് മുസ്‌ലീംലീഗ് നേതൃത്വത്തിന്റെ അറിവോടെയാണ് ബോംബ് നിര്‍മാണം നടക്കുന്നതെന്ന് സി.പി.എം. സംസ്ഥാന സെക്രട്ടറി പിണറായി വിജയന്‍ ആരോപിച്ചു. ബോംബ് നിര്‍മാണത്തിനിടെ അഞ്ചു പേര്‍ കൊല്ലപ്പെട്ട സംഭവത്തെ കുറിച്ചുള്ള കേന്ദ്രമന്ത്രി മുല്ലപ്പള്ളി രാമചന്ദ്രന്റെ പ്രസ്താവന സംഭവത്തില്‍ ലീഗ് നേതൃത്വത്തിനുള്ള പങ്കാണ് തെളിയിക്കുന്ന്. ബോംബ് നിര്‍മാണത്തിന് മുസ്‌ലീംലീഗിന് ഒരു തീവ്രവാദ സംഘടനയുടെ പിന്തുണ ലഭിക്കുന്നുണ്ടെന്നും പിണറായി വാര്‍ത്താസമ്മേളനത്തില്‍ കുറ്റപ്പെടുത്തി.

മുസ്‌ലീം ലീഗ് വലിയ പ്രതിസന്ധി നേരിടുന്ന സമയമാണിത്. ഈ പ്രശ്‌നം യു.ഡി.എഫിനെയും ബാധിച്ചിട്ടുണ്ട്. അതുകൊണ്ടുതന്നെ പൊതുജന ശ്രദ്ധ ഇത്തരം പ്രശ്‌നങ്ങളില്‍ നിന്ന് തിരിച്ചുവിടാന്‍ അക്രമങ്ങള്‍ ആസൂത്രണം ചെയ്യുകയാണ് ലീഗ് നേതൃത്വം. ഇതിന്റെ ഭാഗമായാണ് നാദാപുരത്ത് സ്‌ഫോടനമുണ്ടായത്. മുസ്‌ലീം ലീഗിന്റെ ഒരു പ്രാദേശിക നേതാവിന് ഈ സ്‌ഫോടനത്തില്‍ പങ്കുണ്ട്. ലീഗിലെ ഒരു വിഭാഗത്തിന് ഇക്കാര്യത്തില്‍ ഒരു തീവ്രവാദ സംഘടനയുടെ സഹായവും ലഭിച്ചിട്ടുണ്ട്. ഈ സ്‌ഫോടനത്തില്‍ അന്താരാഷ്ട്ര തീവ്രവാദ സംഘടനകള്‍ക്ക് പങ്കുണ്ടോ എന്ന കാര്യം അന്വേഷിക്കേണ്ടതുണ്ട്.

നാദാപുരം സംഭവത്തില്‍ ലീഗിന് എന്തോ മറച്ചുവയ്ക്കാനുണ്ട്. ഇതിന്റെ പിറകില്‍ വലിയൊരു ഗൂഢാലോചന നടന്നിട്ടുണ്ട്. കഴിഞ്ഞ നിയമസഭാ തിരഞ്ഞെടുപ്പിന് മുന്‍പ് മാനഭംഗക്കഥ കെട്ടിച്ചമച്ച് ഒരു സി.പി.എം. പ്രവര്‍ത്തകനെ കൊലപ്പെടുത്തിയിരുന്നു. ഇത്രയും ഗുരുതരമായ പ്രശ്‌നമുണ്ടായിട്ടും ലീഗിനെ ന്യായീകരിക്കാനാണ് കോണ്‍ഗ്രസ് ശ്രമിക്കുന്നത്-പിണറായി പറഞ്ഞു. നാദാപുരത്ത് സമാധാനം പുന:സ്ഥാപിക്കാന്‍ സി.പി. എമ്മിന്റെ ഭാഗത്തു നിന്നും എല്ലാവിധ സഹകരണവുമുണ്ടാകുമെന്നും പിണറായി പറഞ്ഞു.

പ്രിയ സഖാവെ...
ഞാന്‍ ഒരു സഖാവല്ല.ഒരു മുസ്ലിം ലീഗുകാരന്‍ ആണ്.എങ്കിലും എന്റെ കോളേജു ജീവിതത്തിനിടയില്‍ ഒരു എസ് എഫ് ഐ പ്രവര്‍ത്തകന്‍ ആകാന്‍ ആഗ്രഹിച്ച വ്യക്തിയാണ്. നിങ്ങള്‍ക്കത് അറിയണമെങ്കില്‍ , അന്ന് ഞങ്ങളുടെ കോളേജിലെ നിങ്ങളുടെ നേതാവിന്റെ പേര് ഞാന്‍ പറഞ്ഞു തരാം,താങ്കള്‍ക്കു ചോദിക്കാം.അല്ലെങ്കില്‍ എം എസ് എഫിന്റെ ഇന്നത്തെ കോഴിക്കോട് ജില്ല നേതാവായ ബഹു: മൊയ്ദീന്‍  കൊയയോടും ചോദിക്കാം. എന്നിട്ട് എന്ത് കൊണ്ട് ആയില്ല എന്നാണ് നിങ്ങളുടെ ചോദ്യം എങ്കില്‍,
ഞാന്‍ ജനിച്ചത്‌ നാദാപുരത്തിന്റെ  മണ്ണില്‍ ആയതു കൊണ്ട് എന്നേ പറയാനുള്ളൂ..
ഞാന്‍ ജനിച്ചത്‌ വാണിമേലിന്റെ മണ്ണില്‍ ആയി എന്നേ എനിക്ക് പറയാനുള്ളൂ..

ഞങ്ങള്‍ക്ക് വേണ്ടി മരിച്ച ധീരര്‍..

പ്രിയ സഖാവെ..
എനിക്കറിയില്ല ഇത് നിങ്ങളുടെ കയ്യില്‍ എത്തുമോ എന്ന്,എങ്കിലും നിങ്ങളുടെ വീടിന്റെ ചിത്രം അടക്കം നിങ്ങള്‍ക്കെതിരെ ഉയര്‍ന്ന എല്ലാ ഇന്റര്‍നെറ്റ് പ്രചാരണങ്ങളും നിങ്ങളില്‍ എത്തിയെങ്കില്‍, ഇതും നിങ്ങളുടെ കയ്യില്‍ എത്തുമെന്ന് ഞാന്‍ വിശ്വസിക്കുന്നു. സിനിമകളില്‍ കാണുന്ന പോലെ, കയ്യില്‍ കിട്ടിയാല്‍ ആരും കാണാതെ വലിച്ചു കീറുന്ന നിവേദനങ്ങളില്‍  ഒന്നായി നിങ്ങളിതിനെ കാണരുത്, നാദാപുരത്തിന്റെ മണ്ണില്‍ ജനിച്ചു എന്നത് കൊണ്ട്, വാണിമേലിന്റെ മണ്ണില്‍ ജനിച്ചു എന്നത് കൊണ്ട്, ഒരു പടക്കത്തിന്റെ ശബ്ദം കേട്ടാല്‍ പോലും ഞെട്ടുന്ന ആയിരക്കണക്കിന് അമ്മമാരുടെയും, ഭാര്യമാരുടെയും, മക്കളുടെയും ഉപ്പമാരുടെയും മനസ്സില്‍ നിന്നുള്ള തേങ്ങലായി നിങ്ങളിതിനെ കാണുക.

പ്രിയ സഖാവെ..
പ്രതിപക്ഷത്തിരിക്കുമ്പോള്‍ എങ്കിലും  കുറച്ചു നല്ല പ്രവര്‍ത്തനം കാഴ്ചവെക്കുന്ന ഒരു പ്രസ്ഥാനം ഉണ്ടെങ്കില്‍ അത് ഇടതു പക്ഷം ആണ് എന്നതില്‍ തര്‍ക്കമില്ല.
പ്രതിപക്ഷത്തിരിക്കുമ്പോള്‍ എങ്കിലും  ജനകീയ പ്രശ്നങ്ങളില്‍ ഇടപെടുന്ന ഒരു പ്രസ്ഥാനം കേരളത്തില്‍ ഉണ്ടെങ്കില്‍ അത് നിങ്ങളുടെ പാര്‍ട്ടി എന്നതില്‍ തര്‍ക്കമില്ല.
പ്രതിപക്ഷത്തിരിക്കുമ്പോള്‍ എങ്കിലും , അധ:സ്ഥിതന്റെ, മര്‍ദ്ധിതന്റെ കൂടെ നില്‍ക്കുന്ന കേരളത്തിലെ ഒരു പാര്‍ട്ടി നിങ്ങളുടെതാണ് എന്നതില്‍ തര്‍ക്കമില്ല.
എന്നിട്ടും എന്നേ പോലെ ഇങ്ങിനെ വിശ്വസിക്കുന്ന ആയിരക്കണക്കിന് നാദാപുരത്തെ മണ്ണില്‍ ജനിച്ച ഒരു മുസ്ലിം നാമധാരിയും നിങ്ങളുടെ സംഘടനയുടെ ഭാഗമാകാത്തത് എന്തുകൊണ്ടെന്ന് നിങ്ങള്‍ക്കിത് വായിച്ചാല്‍ അറിയാം.

പ്രിയ സഖാവെ..
മലപ്പുറത്തെ വെട്ടിയാല്‍ പച്ച ചോര ഒഴുകുന്ന മുസ്ലിം സമൂഹത്തിന്റെ ഇടയില്‍, വിപ്ലവത്തിന്റെ ചുവപ്പന്‍ ചോര വിരിയിക്കാന്‍ ഇറങ്ങിയ നിങ്ങള്ക്ക്  അതിനെ മുഴുവനായി ചുവപ്പിക്കാന്‍ ആയില്ലെങ്കിലും  നൈമിഷികം ആയെങ്കിലും കുറച്ചെങ്കിലും അതില്‍ വിജയം കണ്ട നിങ്ങള്ക്ക് നാദാപുരത്തിന്റെ മണ്ണില്‍ മുസ്ലിമായി ജനിച്ചവന്റെ മനസ്സില്‍ ഒരു കടുമണി തൂക്കം പോലും നിങ്ങളുടെ പ്രസ്ഥാനത്തിന്റെ ആശയം വിരിയിക്കാന്‍ പറ്റാത്തത് എന്ത് കൊണ്ടെന്നു നിങ്ങള്‍ ആലോചിച്ചിട്ടുണ്ടോ!?
നാദാപുരത്തിന്റെ മണ്ണിലെ നിയമസഭ സീറ്റുകളിലെ നിങ്ങളുടെ വിജയം ആണ് നിങ്ങള്‍ കാണിച്ചു തരുന്നെങ്കില്‍, തെറ്റി സഖാവെ..നിങ്ങള്ക്ക് തെറ്റ് പറ്റി.ആയിരക്കണക്കിന് വരുന്ന മുസ്ലിം യുവാക്കള്‍ പ്രവാസികളായി കഴിയുന്നത്‌ കൊണ്ട് മാത്രമാണ് നിങ്ങള്‍ക്കിവിടെ വിജയിക്കാന്‍ ആവുന്നത്, എന്ന് പ്രവാസിക്ക് വോട്ടു അവകാശം കിട്ടുന്നുവോ , അന്ന് തീരും ഈ ഒരു സീറ്റിലെ നിങ്ങളുടെ പാര്‍ട്ടിയുടെ ഇരുത്തം.
കേരളത്തിലെ ഏത് നിയമസഭ സീറ്റ് എടുത്തു നോക്കിയാലും നൂറു കണക്കിന് മുസ്ലിം ചെറുപ്പക്കാരെ നിങ്ങള്ക്ക് കാണിച്ചു തരാനുണ്ടാവും നിങ്ങളുടെ പാര്‍ട്ടിയില്‍.എന്നാല്‍ നാദാപുരത്തിന്റെ മണ്ണില്‍ മഷിയിട്ടു നോക്കിയാല്‍ കാണാന്‍ പറ്റുമോ അത്തരക്കാരെ, പറ്റില്ല സഖാവെ പറ്റില്ല. ലോകത്ത് നടക്കുന്ന സംഭവ വികാസങ്ങളെ പറ്റി കൂലങ്കഷമായി ചിന്തിക്കുന്ന നിങ്ങള്‍ക്കും നിങ്ങളുടെ പാര്‍ട്ടിക്കും, നാദാപുരത്തെ ഈ ഒരു അവസ്ഥയെ കുറിച്ച് ചിന്തിക്കാന്‍ ഒരു മണിക്കൂര്‍ ചിലവഴിക്കാമോ?
ഇനി നിങ്ങള്‍ കാണിച്ചു തരുന്നത്, തൂണേരി  ബ്ലോകിലേക്ക് മത്സരിച്ചു ജയിച്ച സലാംകയെ പറ്റി ആണെങ്കില്‍, ഒന്ന് സ്വകാര്യമായി ചോദിച്ചു നോക്കൂ അദ്ദേഹത്തോട് തന്നെ , എന്തുകൊണ്ടാണ് മാര്‍കിസ്ട്ടു പാര്‍ട്ടിയില്‍ ചേര്‍ന്നതെന്ന്,അദ്ദേഹത്തിനും പറയാനുണ്ടാവും ഒരുപാട്...എങ്കിലും എനിക്ക് പൂര്‍ണ്ണ വിശ്വാസമുണ്ട്‌, നിങ്ങളുടെ പാര്‍ട്ടിയുടെ ഒരു നയ പരിപാടിയും കണ്ടിട്ടല്ല, അദ്ദേഹം നിങ്ങളുടെ പാര്‍ട്ടിയില്‍ ചേര്‍ന്നതെന്ന് (പ്രിയ സഖാവെ..ഇവിടെ നിങ്ങളുടെ പാര്‍ട്ടിയുടെ നയ പരിപാടി എന്നത് കൊണ്ട് ഉദേശിക്കുന്നത്,നാദാപുരത്തിന്റെ മണ്ണിലെ നയ പരിപാടിയെയാണ്, അല്ലാതെ, കേരളത്തിലെ അല്ല.)

പ്രിയ സഖാവെ..
നിങ്ങളുടെ പ്രസ്താവനയില്‍ നിങ്ങള്‍ പറഞ്ഞുവല്ലോ കെട്ടിച്ചമച്ച ഒരു പീഡന കേസിനെ പറ്റി. സഖാവിനു അറിയുമോ , ആ സംഭവം നടക്കുമ്പോള്‍ ഞാന്‍ പത്താം ക്ലാസ്സില്‍ പഠിക്കുന്ന ഒരു കുട്ടിയാണ്.എങ്കിലും ഇന്നും ഓര്‍മ്മയുണ്ട് ആ സംഭവം നടന്നതുമായി ബന്ധപ്പെട്ട പ്രശ്നങ്ങളും, അന്നത്തെ ആ വീടിന്റെ അവസ്ഥയും.നിങ്ങള്‍ കരുതുന്നുണ്ടാവും എന്ത് കൊണ്ട് ഞാന്‍ ഇത് ഇപ്പോളും ഓര്‍മ്മിക്കുന്നുവെന്നു. സഖാവിനറിയുമോ, അന്ന് ഞങ്ങള്‍ക്ക് നഷ്ട്ടപ്പെട്ടത്‌, ഞങ്ങളുടെ ക്ലാസ്സിലെ ഏറ്റവും ചുറു ചുറുക്കുള്ള ഒരു കുട്ടിയുടെ ഭാവിയാണ്. നിങ്ങളീ പറഞ്ഞ പീഡന കേസിലെ സ്ത്രീയുടെ മകന്‍ , അവന്‍ എന്റെ സഹപാഠി ആയിരുന്നു സഖാവെ .

പ്രിയ സഖാവെ..
നിങ്ങള്‍ക്കും ഇല്ലേ ഭാര്യയും മകനും മകളുമൊക്കെ. നിങ്ങളുടെ ഭാര്യക്കാന് ഈ ഒരു ഗതി വന്നതെങ്കില്‍, അതിനു ശേഷം വര്‍ഷങ്ങള്‍ കഴിഞ്ഞു ആരെങ്കിലും അതൊരു കെട്ടിച്ചമച്ച കഥ ആയിരുന്നു എന്നു പറഞ്ഞാല്‍, നിങ്ങള്‍ക്കുണ്ടാകുന്ന വേദന, നിങ്ങളുടെ മകനുണ്ടാകുന്ന വിഷമം, എ സി യുടെ തണുപ്പില്‍   മയങ്ങാന്‍ കിടക്കുമ്പോള്‍ ഒന്നാലോചിക്കാമോ?. അന്ന് ഈ സംഭവം ഒന്നും അറിയാതെ ഞാന്‍ ആ നാട്ടില്‍ പോയപ്പോള്‍, ഞങ്ങളുടെ തന്നെ ക്ലാസ്സിലെ ഒരു കുട്ടിയാണ് എന്നോട് ഇത് ആദ്യം പറയുന്നത്. അത് പറയുമ്പോള്‍, അവന്റെ ഉമ്മ അല്ലാതിരുന്നിട്ടു കൂടി അവന്റെ കണ്ണ് നിറഞ്ഞത്‌ എങ്ങിനെ മറക്കാന്‍ പറ്റും സഖാവെ. അന്ന് ആ വീട് കണ്ടപ്പോള്‍ സഖാവെ, കുഞ്ചന്‍ നമ്പ്യാരുടെ കഥാപാത്രം പോലെ, അരിശം തീരാതെ, അവര്‍ ആ വീടിന്റെ ചുറ്റും നടന്നു അടിച്ചുടച്ച ജനാലുകലാണ് ആദ്യം കണ്ടത്. വീട്ടിലെ ടി വിയും ഫ്രിഡ്ജും അടക്കം കിണറ്റിലാണ് ഉണ്ടായിരുന്നത്, സുരക്ഷക്കായി വെക്കുന്ന ഗ്രില്‍സുകലോന്നും ഈ കാട്ടാളന്‍മാര്‍ക്ക്  മുന്നില്‍ ഒന്നുമല്ലായിരുന്നു  (സഖാവെ..അവരെ സഖാക്കള്‍ എന്നു വിളിക്കാതെ കാട്ടാളന്മാര്‍ എന്നു വിളിച്ചത്, നിങ്ങളുടെ പാര്‍ട്ടിയോടുള്ള ബഹുമാനം കൊണ്ട് മാത്രമാണ്, കാരണം എനിക്കറിയാം യഥാര്‍ത്ഥ കമ്മ്യൂണിസവും ഇടതു പക്ഷവും മനുഷ്യന്റെ മാനത്തിന് വില നല്‍കുന്നവര്‍ ആണെന്ന്,അവരാണല്ലോ സഖാക്കളും..).

പ്രിയ സഖാവെ..
അവനെ അന്ന് കണ്ടു മുട്ടിയപ്പോള്‍ എന്നെ കെട്ടിപ്പിടിച്ചു കരയുമ്പോള്‍ എന്റെ മുതുകില്‍ പതിഞ്ഞ ആ ചുടു കണ്ണ് നീരിന്റെ കാഠിന്യം ഇന്നും പോയിട്ടില്ല സഖാവെ. എന്നിട്ട് അവന്‍ പറഞ്ഞു ഇനി മുതല്‍ അവന്‍ സ്കൂളിലേക്ക് ഇല്ല എന്നു. ഒരു വിധം സ്കൂളില്‍ വരുത്തിക്കാന്‍ കഴിഞ്ഞുവെങ്കിലും, പത്താം ക്ലസോട് കൂടി അവന്റെ ഭാവി അവന്‍ തീരുമാനിച്ചിരുന്നു. ഈ സംഭവത്തിനു മുന്‍പ്, അധികം ആരോടും സംസാരിക്കാതെ ഒരു സാധാരണ  കുട്ടിയായി കഴിഞ്ഞ അവനിലെ മാറ്റം നേരിട്ടരിഞ്ഞവനാണ് സഖാവെ ഞാന്‍ . നിങ്ങളിന്നു നടത്തിയ പ്രസ്താവനയോട് കൂടി ചിലപ്പോള്‍ കേരളത്തിലെ ഭൂരി ഭാഗം ആളുകളെയും നിങ്ങള്ക്ക് പറ്റിക്കാം ആയിരിക്കും.എന്നാലും സഖാവേ എന്നെ പോലുള്ള കുറച്ചു പേരെങ്കിലും ഉണ്ടാകും, ഈ ഒരു സംഭവം ഒരു കേട്ട് കഥയാണെന്ന് പറഞ്ഞു സ്വയം വികൃതമായ നിങ്ങളുടെ ഗതികേട് ഓര്‍ത്തു സങ്കടപ്പെടാന്‍ .

പ്രിയ സഖാവെ..
പിന്നെ താങ്കള്‍ പറഞ്ഞുവല്ലോ ലീഗിലെ ഒരു വിഭാഗത്തിന് തീവ്ര വാദികളുടെ സഹായം കിട്ടുന്നുണ്ടെന്ന്. എങ്കില്‍ സഖാവ് കേട്ടോളൂ, നാദാപുരത്തിന്റെ മണ്ണില്‍ ജനിച്ച ഒരു ലീഗുകാരനും തീവ്ര വാദത്തിന്റെ പങ്കു സ്വീകരിക്കില്ല. എന്‍ ഡി എഫു എന്ന തീവ്ര വാദ സംഘടനയില്‍ പ്രവര്‍ത്തിച്ചു എന്നുള്ളതിന്റെ പേരില്‍ നാട്ടില്‍ ബഹിഷകാരന്‍ നടത്തിയ സമുദായം ആണ് ഞങ്ങളുടെ നാട്ടിലെത്. എന്നാല്‍ സ്വന്തം രക്ഷക്ക് വേണ്ടി, വീടിന്റെ രക്ഷക്ക് വേണ്ടി മുന്നിട്ടിറങ്ങാന്‍ , ഈ മണ്ണില്‍ ജനിച്ച ഏതൊരുവനും ആയുധമോ ബോംബോ എടുതില്ലെങ്കിലെ അദ്ബുധമുള്ളൂ . സഖാവ് മറന്നു പോയോ എന്നറിയില്ല, ത്രിതല തിരഞ്ഞെടുപ്പ് സമയം ഞങ്ങളുടെ പ്രിയ നേതാക്കള്‍ നാട്ടിലെ പ്രശ്നവുമായി ബന്ടപ്പെട്ടു നടന്ന ഒരു സമാധാന കമ്മിറ്റിയില്‍ പങ്കെടുത്തു വരുമ്പോള്‍, ബോംബെറിഞ്ഞു അവരെ കൊല്ലാ  കൊല ചെയ്തത്, അതിന്റെ പേരില്‍ തിരിച്ചു ഒരാളെ പോലും തൊടാന്‍ ഒരു ലീഗുകാരനും തുനിഞ്ഞിട്ടില്ല, കാരണം ഞങ്ങള്‍ ഭീരുക്കള്‍ ആയതു കൊണ്ടല്ല സഖാവെ. മറിച്ചു നിങ്ങളീ സംശയത്തിന്റെ നിഴലില്‍ നിര്‍ത്തിയ അതെ പ്രസ്ഥാനത്തിന്റെ നേതാക്കളുടെ ആഹ്വാനം കൊണ്ടാണ്. അത് കൊണ്ടും അരിശം കഴിയാതെ ബോംബു നിര്‍മ്മിക്കുന്നതിന്നിടയില്‍  നിങ്ങളില്‍ പെട്ട ആറു പേര്‍ പരിക്ക് പറ്റി മരണത്തോട് മല്ലടിച്ചത് വിസ്മരിക്കാന്‍ സമയം ആയില്ലല്ലോ സഖാവെ, കാരണം അവരില്‍ പെട്ട ചിലര്‍ ഇന്നും കിടപ്പിലാണ്.അന്ന് മുസ്ലിം മനസ്സുകളില്‍ ഉയര്‍ന്ന പ്രാര്‍ത്ഥന അവര്‍ക്കൊന്നും സംഭവിക്കല്ലേ എന്നാണ്. കൊല്ലാന്‍ വന്നവനെ സ്നേഹിക്കാന്‍ പഠിപ്പിച്ച ഒരു പ്രവാചകന്റെ അനുയായികള്‍ ആയതു കൊണ്ട് മാത്രമല്ല സഖാവെ ഞങ്ങള്‍ അങ്ങിനെ പ്രാര്തിച്ചത് , പിന്നെ നിങ്ങള്‍ നടത്തുന്ന വിലാപ യാത്രയോട് അനുബന്ധിച്ച് ഉണ്ടാകുന്ന കൊള്ളയും കൊള്ളി വെപ്പും ഉണ്ടാവാതിരിക്കാന്‍ കൂടിയാണ്...ഇത്രയൊക്കെ ആയിട്ടും അവസാനം ഞങ്ങളില്‍ പെട്ട അഞ്ചു പേര്‍ മരിച്ചത്, അവര്‍ ബോംബു ഉണ്ടാക്കിയത് എന്തുകൊണ്ടെന്ന് കൂടി അങ്ങ് അറിയണം.

പ്രിയ സഖാവെ...

പോലീസ് സ്റ്റേഷനില്‍ വെച്ചും ബോംബു ഉണ്ടാക്കുമെന്ന് പറഞ്ഞു മൂന്നാം മാസം കേരളത്തിന്റെ അഭ്യന്തര മന്ത്രി ആയ ചരിത്രം ഉണ്ട് , നിങ്ങളുടെ സഖാവ് കോടിയേരിക്ക്. എന്നാല്‍ ഈ അഞ്ചു പേര്‍ മരിച്ചത് പോലീസ് സ്റ്റേഷനില്‍ വെച്ച് ബോംബു ഉണ്ടാക്കുമെന്ന് പറഞ്ഞിട്ടല്ല. മറിച്ചു ജീവിക്കാന്‍ വേണ്ടിയാണ് അവര്‍ മരിച്ചത്. അതിലെ കാരണങ്ങളിലേക്ക്  പോകും മുന്‍പ് അവരെ ഒന്ന് അറിയണം എന്റെ പ്രിയ സഖാവ്. ആ ധീരന്മാര്‍ ഈ ലോകത്ത് ജീവിച്ചു തുടങ്ങിയിട്ടേ ഉള്ളൂ സഖാവെ, അവരില്‍ പെട്ട ഒരുവന്‍ മൂന്നാം വര്ഷം ഡിഗ്രിക്ക് പഠിക്കുന്നു, അവരില്‍ പെട്ട മറ്റൊരാളുടെ കല്യാണം കഴിഞ്ഞു കൃത്യം 13 ദിവസമേ ആയുള്ളൂ സഖാവെ, അവരില്‍ പെട്ട മറ്റൊരാളുടെ കല്യാണം കഴിഞ്ഞിട്ട് മാസങ്ങളെ ആയുള്ളൂ സഖാവെ, അവരില്‍ പെട്ട ഒരാള്‍ പ്രവാസ ജീവിതത്തിനിടയില്‍ നാട്ടില്‍ അവധിക്കു വന്നതാണ് സഖാവെ. മധു വിധുവിന്റെ മോടി മാറുന്നതിനു മുന്‍പ്, പുസ്തകവും പെന്നും എടുക്കുന്ന പ്രായത്തില്‍, പ്രവാസത്തിലെ കഷ്ട്ടപ്പാടില്‍ നിന്ന് ഒന്ന് വിശ്രമിക്കാന്‍ വന്നവര്‍ എന്ത് കൊണ്ട് ഇതിനു ഇറങ്ങി പുറപ്പെട്ടു എന്ന്  ഒന്ന് ചിന്തിച്ചോ എന്റെ പ്രിയ സഖാവ്. ഇല്ലെങ്കില്‍ ഞാന്‍ പറഞ്ഞു തരാം സഖാവെ, അവര്‍ക്കറിയാം ആയിരുന്നു, പ്രതിരോധിചില്ലെങ്കില്‍ ചിലപ്പോള്‍ മരിക്കുക തന്റെ മാതാപിതാക്കള്‍ ആണ് എന്നു, ചിലപ്പോള്‍ തന്റെ സഹോദരന്‍ , അല്ലെങ്കില്‍ കൂട്ടുകാരന്‍ , അല്ലെങ്കില്‍ മാനഹാനിക്കു വിധേയനാവുക എന്റെ സഹോദരി ആയിരിക്കും എന്നു.  സഖാവിനു അനുഭവിക്കാമോ , മധു വിധുവിന്റെ പതിമൂന്നാം നാളില്‍ മരണപ്പെട്ട തന്റെ പ്രിയതമന്റെ മയ്യിത്ത്‌ നിസ്കരിക്കാന്‍ നില്‍കുന്ന പെണ്ണിന്റെ വേദന, സ്കൂളിലേക്ക് പറഞ്ഞു വിടേണ്ട മകന്റെ മയ്യത് നിസ്കരിക്കാന്‍ നില്‍ക്കുന്ന മാതാപിതാക്കളുടെ വേദന. എന്നിട്ടും അവര്‍ സഹിക്കുന്നത്, അവര്‍ എരിഞ്ഞടങ്ങിയത് ഒരു നാടിനു വേണ്ടി ആണ് എന്നുള്ള സമാധാനം കൊണ്ടാണ് സഖാവെ..

2000 ഇല്‍ കൊല്ലപ്പെട്ട വൃദ്ധന്റെ മൃതദേഹവും അക്രമികള്‍ കെട്ടിടവും

പ്രിയ സഖാവേ..
താങ്കള്‍ പറഞ്ഞുവല്ലോ, മുസ്ലിം ലീഗിന്റെ തീവ്ര വാദ ബന്ധത്തെ പറ്റി. ഒരു തെരഞ്ഞെടുപ്പു കഴിഞ്ഞാല്‍ ഓരോ ബൂത്തിലും കിട്ടുന്ന വോട്ടുകളുടെ എണ്ണം വരെ അറിയാന്‍ ഉതകുന്ന രീതിയില്‍ കുറ്റമറ്റ സംഘടന സെറ്റ് അപ്പ് ഉള്ള  പാര്ടിയാണല്ലോ താങ്കളുടേതു. അതെ സംഘടന സംവിധാനം ഉപയോഗിച്ച്, സൂര്യന്റെ വെളിച്ചത്തില്‍ നിങ്ങളുടെ പാര്‍ട്ടിക്കാരന്‍ ആയും, രാത്രിയുടെ ഇരുട്ടില്‍ ഫാഷിസ്സ്ടുകളുടെ പ്രിയ തോഴന്മാര്‍ ആയും വിലസുന്നവരുടെ കണക്കെടുത്ത് നോക്കിയാല്‍, പാര്‍ട്ടിയുടെ സഖാവ് എന്നു പറയാന്‍ ചിലപ്പോള്‍ നിങ്ങള്ക്ക് ആളെ കിട്ടിയില്ല എന്നു വരും. ഈ അടുത്ത് എന്റെ നാട്ടില്‍ നടന്ന ഒരു സംഭവത്തോടെ അതിന്റെ മുഖം കൂടുതല്‍ തെളിഞ്ഞിരിക്കുന്നു സഖാവെ. എല്ലാ കണക്കെടുപ്പുകള്‍ക്കിടയിലും, ഈ ഒരു കണക്കെടുപ്പിനു ഒരു ദിവസം മാറ്റി വെക്കുമോ താങ്കള്‍? ഇന്ത്യയിലെ മുസ്ലിംകള്‍ പറയാറുണ്ടല്ലോ ബി ജെ പി ആണ്, അല്ലെങ്കില്‍ അവരുടെ പോഷക സംഘടനകള്‍  ആണ് ഫാഷിസ്ട്ടുകള്‍ എന്നു. എന്നാല്‍ സഖാവെ, നാദാപുരത്തെ ഒരു മുസ്ലിമിനോട്‌ ചോദിച്ചാല്‍, അവനു ബി ജെ പി യെക്കാളും, ആര്‍ എസ് എസ്സിനെക്കളും ഭയം സി പി എമ്മുകാരനെയാണ് എന്നു നിങ്ങള്‍ അറിയുമോ. ഒരു മുസ്ലിം മാതാപിതാക്കള്‍ക്ക് ജനിച്ചാല്‍ മുസ്ലിമാണ് എന്ന പോലെ, ഒരു ഹിന്ദു മാതാപിതാക്കള്‍ക്ക് ജനിച്ചാല്‍ അവന്‍ ഹിന്ദുവായി എന്ന പോലെ, നാദാപുരത്ത് ജനിക്കുന്ന ഓരോ മുസ്ലിമും സി പി എമ്മിന് എതിരാകുന്നത് എന്ത് കൊണ്ടാണെന്ന് ഒന്നാലോചിക്കാമോ?അപ്പോള്‍ അറിയാം നിങ്ങള്ക്ക്, ഈ ആക്രമങ്ങളുടെ കാരണം.

പ്രിയ സഖാവെ..
ലീഗിനെ കുറ്റം പറയുന്ന താങ്കള്‍, കഴിഞ്ഞ ദിവസം നിങ്ങളുടെ പാര്ട്ടിക്കാരാല്‍ ആക്രമിക്കപ്പെട്ട പത്തോളം മുസ്ലിം വീടുകളില്‍ ഒന്ന് സന്ദര്ഷിക്കാമോ. അതില്‍ രണ്ടോളം വീടുകള്‍ കൊണ്ഗ്രെസ്സുകാരന്റെ ആണ്. ഇത് ഒരു സി പി എം - ലീഗ് സംഘര്‍ഷം ആണെങ്കില്‍ എന്തിനു അവരുടെ വീട് ആക്രമിക്കപ്പെട്ടു സഖാവെ. ഉത്തരം അവര്‍ യു ഡി എഫിന്റെ ഭാഗം ആയിരുന്നു എന്നാണെങ്കില്‍ നിങ്ങള്‍ കുറെ വിയര്‍ക്കും സഖാവെ, കഴിഞ്ഞ ആക്രമണങ്ങളില്‍, ആക്രമിക്കപ്പെട്ട ആദ്യ അഞ്ചു വീടില്‍ ഒന്ന് നിങ്ങളുടെ എല്ലാം എല്ലാം ആയിരുന്ന ജനതാദള്‍ പ്രവര്‍ത്തകന്റെ വീട് ആയിരുന്നു(2000 ഇല്‍ നടന്ന അക്രമം ).എന്ത് കൊണ്ടാണ് സഖാവെ എന്ന് അധികം ആലോചിക്കേണ്ട. കാരണം അവന്റെ പേര് മുസ്ലിമിന്റെതായി പോയി സഖാവെ. നിങ്ങളുടെ പാര്‍ട്ടിയില്‍, നാദാപുരത്ത് സംഭവിച്ച ജീര്‍ണ്ണത ആണ് സഖാവെ. ഈ പത്തോളം വീടുകള്‍ സന്ദര്‍ശിച്ച ഒരു സ്നേഹിതനോട്  (അദ്ദേഹം മാധ്യമ പ്രവര്‍ത്തകന്‍ കൂടി ആണ് ), ആണുങ്ങള്‍ ആരുമില്ലാത്ത വീട്ടിലെ വൃദ്ധയായ സ്ത്രീ ചോദിച്ച ചോദ്യം എന്താനെന്നരിയുമോ സഖാവിന്നു. "ആണുങ്ങളായ നിങ്ങള്ക്ക് ഇവരെ പ്രതിരോധിക്കാന്‍ ആവില്ലെങ്കില്‍ പറയെടോ, ഞങ്ങള്‍ ഇറങ്ങാം " എന്ന്.

പ്രിയ സഖാവേ..

ഈ സ്ഫോടനത്തിന് അന്താരാഷ്ട്ര തീവ്ര വാദത്തിനു ബന്ധമുണ്ട് എന്നു പറഞ്ഞുവല്ലോ താങ്കള്‍.വായില്‍ തോന്നിയത് കോതക്ക് പാട്ട് എന്നുള്ള രീതിയില്‍ പറയാതെ പറയുന്നതിന്റെ ഗൌരവം ഉള്‍കൊള്ളാന്‍ ‍, മഹത്തായ ഒരു പ്രസ്ഥാനത്തെ പ്രതിനിധീകരിക്കുന്ന താങ്കള്‍ തയ്യാറാവണം. സഖാവെ, ഞങ്ങള്‍ക്ക് പ്രതിരോധിക്കാന്‍ , ഞങ്ങളുടെ കുടുംബത്തിനു സമാധാനത്തോടെ അന്തിയുറങ്ങാന്‍ , ഒരു അന്തരാഷ്ട്രതിന്റെയും ബന്ധം ആവശ്യമില്ല. പ്രിയ സഖാവ് അറിഞ്ഞു കാണുമോ എന്നറിയില്ല, കഴിഞ്ഞ കലാപത്തിന്നിടയില്‍, നിങ്ങളുടെ പാര്ട്ടിക്കാരാല്‍  കൊല്ലപ്പെട്ട 60  വയസ്സിനു മുകളില്‍ പ്രായമുള്ള വൃദ്ധന്റെ മരണം എങ്ങിനെ ആയിരുന്നു എന്നു. സ്ത്രീകളും ഈ വൃദ്ധനും മാത്രം ഉണ്ടായിരുന്ന വീട്ടില്‍, പേടിച്ചു ഒരു റൂമില്‍, മുന്‍പിലെ വാതിലും ഗ്രില്സും അടക്കം എല്ലാം പൂട്ടി  കഴിഞ്ഞിരുന്ന ആ പാവത്തെ കൊന്നത്, വീടിന്റെ മുകളിലൂടെ കയറി വന്നു ആ സ്ത്രീകളുടെ മുന്നില്‍ ഇട്ടിട്ടാണ്. എന്നിട്ട് ആ ശരീരവും കൊണ്ട് വരുന്ന വിലാപ യാത്രക്ക് നേരെ ആക്രമം നടത്തിയത് പോകട്ടെ സഖാവെ, ആ മൃതദേഹത്തിന് നേരെ വരെ കല്ലെറിഞ്ഞ ചരിത്രം ഉണ്ട് നിങ്ങളുടെ പാര്‍ട്ടിക്ക്.

പ്രിയ സഖാവെ..

നാദാപുരത്തിന്റെ സമാധാനത്തിനു എന്തിനും തയ്യാര്‍ ആണെന്ന് പറഞ്ഞല്ലോ താങ്കള്‍, അത് ആത്മാര്‍ഥതയോടെ ആണെങ്കില്‍ ഒരേ ഒരു കാര്യം ചെയ്യാമോ. നിങ്ങളുടെ പാര്‍ട്ടിയില്‍ പെട്ട ഇത്തരക്കാരെ ചെവിക്കു പിടിച്ചു പുരതിടാമോ. ചിലപ്പോള്‍ നിങ്ങളുടെ പാര്‍ട്ടിക്ക് കുറെ ആളുകളെ നഷ്ട്ടപ്പെട്ടെക്കം. എന്നാല്‍ ഞാന്‍ ഉറപ്പു തരുന്നു, ആ നഷ്ട്ടം നിങ്ങള്ക്ക് നൈമിഷികം മാത്രം ആയിരിക്കും. മുസ്ലിം വിഭാഗത്തില്‍ പെട്ടവര്‍ നിങ്ങളുടെ പാര്‍ട്ടിയില്‍ വരാനുള്ള ധൈര്യം  കാണിക്കും. നിങ്ങള്‍ ഈ സമൂഹത്തോട് ചെയ്യുന്ന ഏറ്റവും വലിയ നന്മ ആയിരിക്കും സഖാവെ ആ പ്രവര്‍ത്തി.

പ്രിയ സഖാവെ..
മെഴുകുതിരിയെ പോലെയാണ് സഖാവെ അവര്‍ ഞങ്ങള്‍ക്ക്.

നാദാപുരത്തെ ഓരോരുത്തര്‍ക്കും വേണ്ടി സ്വയം ഉരുകിയ ,
നാദാപുരത്തെ ഓരോ കുടുംബത്തിനും വേണ്ടി സ്വയം ഉരുകി ഇല്ലാതായ,
നാദാപുരത്തിന്റെ ഓരോ അമ്മയുടെയും, സഹോദരിയുടെയും, മാതാപിതാക്കളുടെയും മാനം സംരക്ഷിക്കാന്‍ സ്വയം ഉരുകി ഞങ്ങള്‍ക്ക് വെളിച്ചമായി മാറിയ ധീരര്‍...
നിങ്ങള്‍ വര്‍ഷാ വര്ഷം ചൊല്ലും പോലെ "ഇല്ലാ ഇല്ല മരിച്ചിട്ടില്ല ഞങ്ങളിലൂടെ ജീവിക്കുന്നു" എന്ന് പറയാനൊന്നും ചിലപ്പോള്‍ ഞങ്ങള്‍ മുതിര്‍ന്നെന്നു വരില്ല. 

എന്നാല്‍ നാദാപുരത്തിന്റെ മണ്ണിലെ ഓരോരുത്തന്റെയും മനസ്സില്‍ അവര്‍ക്ക് വേണ്ടിയുള്ള പ്രാര്‍ത്ഥന ഉണ്ട്, 

അവരുടെ കുടുംബത്തിനു വേണ്ടിയുള പ്രാര്‍ത്ഥന ഉണ്ട്. 

അത് മതി ഞങ്ങള്‍ക്ക്. 

കാരണം, ഞങ്ങളുടെ ജീവിതം ഇവിടം കൊണ്ട് തീരുന്നില്ലല്ലോ സഖാവെ.

പിന്‍ കുറിപ്പ്: 

മുസ്ലിം പേരുള്ള യൂദാസുകളോട്  ..
നിങ്ങളുടെ ഓരോ വാക്കും ഞങ്ങളുടെ മനസ്സിലുണ്ട്. അത് വന്നു തരക്കുന്നത് ഞങ്ങളുടെ നെഞ്ജിലാണ്..
നമുക്ക് കാണേണ്ടി വരും, ചിലപ്പോള്‍ ഇവിടെ വെച്ച് തന്നെ, അല്ലെങ്കില്‍ മറ്റൊരു ലോകത്ത്.